成功等運到?

坊間有很多教人「成功」的課程或例子，通常會提及什麼內容?

人定勝天? 你唔成功因為你未夠努力，未夠想要? 好多所謂「成功」課程都特別強調「個人能力」。

投資界中，巴菲特無人不識，係一個成功既投資人，大家會認為佢好叻，獨具慧眼，有過人的投資才能。大家都爭相去學佢既成功之道，研究巴菲特的投資方法。如果巴老同你講佢既成功只係好彩，你一定會話佢「太謙虛」。

但睇完「Outlier 異數」問呢書，可能你都會認同巴老某程度上只係「好彩」。書中作者會證明俾你睇，「能力」只要過到一個「門檻」，其餘令你成功既往往係外在因素。一篇推薦序用了「一命二運三風水」作簡介，實在十分貼切。

IQ低過100就當然成就有限，但如果有幾個人IQ都係高過120，又係咪IQ越高就越成功呢? 個人能力其實只要過到「門檻」就夠。IQ 80同 IQ 120分別可能很大，但IQ 160 同 IQ 200呢?

如果個人能力未能解釋一個人成功與否，咁，會係咩原因?

一命
機緣巧合下，作者「統計」咗美國頂尖足球隊隊員既出生月份，發現當中有6至7成人都係1月至3月出世，下半年出世既球員就更加係絕無僅有。是巧合抑或天意? 原來選拔球員時以年份劃分組別，較早月份出生的小朋友自然在體格發育上有優勢，跑快兩步，入選精英隊機會更高，繼而自細訓練時數多咗，大個時就自然做到頂尖球員。

所以就算你一出世就係打波天才，發育遲人幾個月就蝕晒章。大B發育較快，細細個入選校隊，日操夜操之下，到十幾歲咪變咗「天才球員」囉。當然，作者都補一補飛，你天資要有返咁上下，過到個「門檻」先有機會「被栽培」啦！例如你想打籃球的話，未必要高過兩米先有得打波，但起碼你都要高過一米七先得，要過到籃球隊個「門檻」囉。



港媽唔知係咪睇過呢本書，佢「贏在射精前」既觀點同作者同出一轍喎！生返個大B真係有著數呢！

出生已經贏在起跑線，是為一命。


二運
出生於適合的年份，加埋有運遇上適合既時機就發達喇！作者舉咗Bill Gates做例子。1975年是個人電腦誕生的一年，而Bill Gates正值壯年，廿歲後生仔有的是時間及熱情，全情投入搞Microsoft，配合個人電腦一日千里既發展，時勢造英雄。

如此推算的話，FaceBook喺2004年成立，即係食到社交平台呢個勢既人應該係1984年出世。睇下而家既網紅，KOL多數係咩年紀呢?

1982年 司徒夾帶
1987年 達哥
1988年 薑檸樂
1988年 EMINLEO
1992年 伍公子

比起Bill Gates，年份相差由20年去到16年左右，可能係資訊發達，人又早熟咗，令到個Cycle短咗，16-17歲開始玩社交平台都唔算早既。

又睇下香港人最鍾意講既買樓係咩情況。25-30歲收入穩定，到達適婚年齡，不少人都喺呢個年紀開始置業。照咁推斷返，2003年啱啱到25-30歲既呢班人，出生年份大約係1973-1978，大家不妨統計吓呢個年紀既人係咪特別多「樓神」? 教你一開二、二開四、四開八做收租佬?

生逢其時，是為二命。


三風水
有啲人話風水唔係全然迷信，我都Buy呢個講法，所以重點係想講環境對一個人成就既影響。

漢堡的夜店是披頭四的風水地，因為她每天提供了足8小時的表演機會給未成名的他們；Lakeside School是Bill Gates的福地，因為當年學校的家長會買了電腦給學生，讓他從十三歲開始做電腦程式設計。

環境育成，是為三風水。



總結書中作者觀點，一個人成功未必關佢個人叻唔叻事，反而大家應該多啲考慮下天時地利人和等其他外在因素，即係中國人話既「一命二運三風水」。「成功人士」好可能只係「贏在起跑線」、「好彩」、加埋「環境配合」咋。


喺投資路上都啱喎！



一命：如果有「父幹」駛乜儲到死死下先有首期買樓吖！又如果有「父幹」資金，同你細細注，慢慢儲返嚟投資已經係兩回事。

二運：如果好彩買中一次「十倍股」咪個個叫佢股神咯，又或者個市係乜都升既，好似2016年年頭咁，你肯買股票，根本是但篤一隻而家埋單都升幾成。

三風水：真人真事，朋友打工仔一名，幫公司搞上市創業板，唔夠幾個月升咗十幾廿倍。你要生活喺嗰個工作圈子先可以遇到呢啲機會。

參考資料:

Outlier 異數