恒指PE及息率

恆生指數估值(資料提供:Analystz.HK)

2020年6月10日 星期三

【情緒指標】人心難測

【人心】

3月份大家都十分恐慌,恐怕資產進一步下跌,個個套現之下,一輪急跌下更有不少做孖展的人被斬倉或自行止蝕保倉。

來到6月份...生存下來的人都是贏家了,但面對人心難測,後市更加難估,還是保守為上,保持一定倉位之餘,亦保留一定現金。無膽一注獨贏,唯有大包圍控制注碼啦!

=====
【板塊強弱】

Watchlist內的美股...大都升了3至4成,部份如TSLA更升近一倍 (不少網友今次fat fat 鳥)

美債更誇張...3月腰斬後,很多已升一倍,回復正常水平了 (個別違約例子除外)

唯獨香港本地股獨憔悴...政治不穩下,本地股恐怕前景更見暗淡,高不成、低不就,漸漸被取代、被消失只是遲早的事。事實擺在眼前,中國概念股仍然又穩又強勢。

=====
【矛盾】

如果3月人心虛怯時開始分段買入,至今回報已相當唔錯,是時候適量減磅了。

可惜我太膽怯,分段入得較慢,呢兩個月回升得比預期急、勁、快,升下升下已經回復3月前的水平。原定半年的分段入市計劃不太順利呢,唯有物色下個別弱勢股,少少咁買下供下啦。

近月現象實在奇怪...明明經濟前景不明,各國通縮,收入減少,股樓等資產仍然繼續gogogo....

收入越來越低,資產越來越貴....窮人生活真艱難呢...

2020年3月20日 星期五

人心虛怯 - 情緒指標

股災之下你話唔驚就假。

即使身經百戰,有晒計劃,面對跌市都係會心虛。

其實心虛更係好事,因為你既情緒正正話俾你知要點做,逆情緒而行就準無錯。

==============
有心理學底子好似對人心同埋自己既情緒比較敏感,用大眾同自己情緒去預測都幾準。


<<以下憑感覺猜測>>

如果下跌有3波: 1. 接刀 / 2. 淆底 / 3. 絕望

1. 接刀: 3月頭第一波急跌,大家仲未覺得有危機,大部份人都仲十分興奮,趁跌踴躍入市。

2. 淆底: 今個星期係第二波,開始淆底,入市變得審慎,部份人爆倉或資金開始用完。跌過龍之後今日開始做個小型反彈,有人會開始追貨。反彈完就接第三波,斷崖式跌多一次,。

3. 絕望: 仲未出現既第三波。以往跌市最後階段都係磨一段相當長、股價唔上唔落既時間,成交漸漸縮減,令大家入市意欲極低,無人再有膽同資金入市先會漸見曙光。

==============

不幸地我都太早接咗唔少刀,結果昨日大跌十分淆底,只買到少少貨。如果呢幾日有明顯反彈都會順勢減一減倉再等機會。

但要一次過All-in 摸到底係極難,成手Cash容易錯失時間同機會成本,所以都係老土有效策略 - 分段買入吧。

分段除咗要分注,仲要分時間,呢點好多人忽略!每跌10%買一注的話,好似呢兩星期個市況咁,日日都跌10%,好快就無晒錢。

==============
疫情之下,錢銀事小...大家保重身體,照顧自己同家人。


7%股息

早幾個月要搵隻7%股息既難過登天,即使Preferred Stock或high yield債都唔多。

今日恒指成份股隨便執一隻都係.... (假設未來唔減派息)


REIT 昨日血洗一輪之後就更見誇張...



溫馨提示: 小心賺息蝕價!

賤物鬥窮人,你仲有無錢同膽?

2020年3月16日 星期一

股災下之部署

過年前後大家都十分樂觀,覺得疫情好快會減退....至到近兩星期歐美大爆發就gg了!

美股之前升過龍,回調超急。港股之前升幅較小,對比之下跌幅亦較小,但個人認為仍有機會追跌呢,不能太樂觀,何況歐美都未到最差情況。而家升下跌下可能會引到不少人博反彈....反彈完後會否跌到更慘? 暫時看來機會頗高......想入市都係分段同分注,好好控制注碼吧。


=========
先整理一下跌到hihi後既情況:

股: 平均跌20-30%,重倉的NFLX 尚未跌穿平均成本$312...,剩返倉底既HKTV亦仍然硬淨。1長和同太古地產都跌到hihi,上星期減咗倉留錢買其他一線股。

優先股: 有少量high yield業績差既優先股跌咗近一半,即使Ford都要跌20-30%

債/ETD: 有部份能源相關板塊跌咗一半,其他約跌10-20%不等

幸好近大半年只係少量增加倉位,主要調整組合。加上$5樓上止賺咗大部份HKTV,而家可以比較從容面對。


未來部署
今日低位,明日高位。跌市要有心理準備預咗捱。捱幾耐? 下圖話你知,起碼都三五七個月,點會一兩星期咁快跌完?

交易日標普500(平均數)道指(平均數)
近期高位至進入熊市137136
進入熊市至熊市底83143
熊市底至走出熊市6363
熊市持續日數146206

持有既現金計劃買入香港 / 美國指數ETF + 一線龍頭股 + 少量investment grade 債券。

一線資產平時唔會點跌,唯有係股災時先會無差別跟跌。而且災後最快復原反彈一定係呢堆一線既龍頭。今次係絕好機會買入一線資產。果斷放棄二、三線資產套現,留現金逐步吸納一線。

但經濟仍有一大隱憂...疫情持續落去結業裁員潮後市道會差到爆!無咗份工無收入的日子肯定十分難捱...無埋其他收入,例如: Part-time工作、租金、股息等,就直情spring pocket being bbq'ed,所以一定、一定、一定要留有充足儲備生活以防萬一。


細女即將出世,開支又要增加了,樂觀的我都有啲淆底呢.....你呢個女真係生於亂世....錢銀事少,Daddy最希望你健健康康啦!比較遺憾既係今次不能陪產了!

2020年2月17日 星期一

2020倉位更新

股  ~40%
最重倉三隻股:
NFLX
長和
太地

睇個勢香港地產股有排都無運行....希望今年有靚位轉轉倉,或者有買入其他行業既機會,暫時無乜心水呢。


優先股/ETD/債 ~25%
2019年開始分散買咗一堆,每隻都係買少少試下先,今年會繼續吸納。(多謝幾位經常分享定息投資物既Blogger,風中追風Cherry皮老闆)


現金 ~40%
經濟麻麻....留多少少儲備過冬吧!減薪裁員已經近在咫尺,奇怪的是好多人都未有危機感? 沒有大陸資金及自由行幫助下,香港真係可以似2003年般快速彈起身?




又舊又細自住一層....當租樓吧...唔計入上面比例。
今年可以再轉按,但估價下跌後,估計無得套錢/賺rebate了。

2020年2月13日 星期四

HKTV 配股


HKTV 係港股組合最重倉既成員。

自爆發疫情開始,大家都匿喺屋企網購,HKTV 就日日升。

今個星期HKTV 仲升到傻咗,高見$7樓上,成交暴增,仲超過埋tvb市值,成為一時熱話,朋友group 都不停討論。果然... 一上頭條,多人留意就代表過熱啦,上完高位就極速回落,尋日仲公佈咗會折讓配股tim!

原本都諗住逐步止賺,餘下揸多陣,讓子彈飛下,但配股消息短期明顯弊多於利,加上經濟麻麻,都係保守啲,止賺2/3,留返少少做倉底算,揸得安心瞓到覺。雖然而家望返$7高位好可惜,但對比買入價$4樓下其實已經回報可觀!十分滿意。無謂掛住$7高位又唔捨得放手啦。待成交縮減,無人留意時再候機吸納啦!

平均價低於$4
見前blog 文

2020年1月2日 星期四

2019年回顧

今年出文甚少,簡單做個回顧留個紀錄。

<Blog>
呢兩年好少出文...一來自己無乜料好寫;二來工作上已經常要「作文」,返工已經寫到攰爆;三來少咗上Blogger流連,睇Blog友既文同留言都甚少。

下年定個目標每月出一篇update下近況吧!

免費寫好文的Blogger買少見少,大家多多留言、俾Like、Share、買書等方式支持下啦!唔好淨係做CD-ROM呀!



<投資>
[方向]
1. 減中港股,增加美股。美股不停升真係好難搵位入貨....
2. 建立固定收益產品組合: 包括優先股、ETD、企業債等。

[回報]
仲未計,以前每月埋數update,今年超級勁懶。拉勻我估平手吧,無乜大上落。

[個股] 幾個擦肩而過的獲利機會:
1. 年頭放走了石藥
2. HKTV未能把握到高位$4樓上出貨。
3. 比亞迪電子不夠耐性坐貨


<事業>
摸索了作為Slash的一段時間,多了對工作及時間的自主權,在可見將來Full-time job只會越來越少,Slash成為主流工作模式相信會喺我退休前出現。讓自己早點投入Slash族,不斷學習,增加employability會是好事。

陪伴家人及自己Hea的時間亦多了,平日可以送完囡囡返學去做下Gym然後先開工,真心爽皮。自由換來的代價是收入的不確定及不穩定性。

2019仍在摸索Slash的工作方向及模式,似有還無,感覺還是有點「虛」,跟打死一份工的形式及感受截然不同,當中有苦有樂吧。2020要繼續發展自己的Business Model。又跟朋友開始了一門蝕本生意,十分好玩又有滿足感,雖然未賺到錢,但我相信係有市場價值。


<家庭>
轉眼間女兒上學了。頭一個月雖然沒有太多哭鬧,但到學校門口總要抱到實,不願落地入校門。到而家會自己背著書包行入學校,返到屋企會講掛住學校、掛住老師,又經常分享學校發生的事情。感覺她真的長大了很多,很快會有自己的一大片天地了。爸爸真的十分不捨,希望多陪伴跟抱抱她。再過一陣子,她就不要我陪,不要我抱了...

Slash工作關係,可以抽到平日的時間同太太倆口子拍下拖,絕對是件幸福的事。

2020年,期待小女兒的到來,讓這個家更幸福更熱鬧。

=============

今年最大的學習是Gain & Loss。有失亦有得。擁抱得到的,捨棄失去的。

失去的可能很苦痛,但得到的也會很甘甜。